Kinta-feira, 02 de Maiu de 2013

 

«Moi, (…), si j’avais cinquante-trois minutes à dépenser, je marcherais tout doucement vers une fontaine…» - Liurai-Oan Ki’ik dehan ba ita. Ita hotu dala balu iha sorte bainhira ita biban halo viajen ne’ebé dalan ke ita la’o mós interesante hanesan fatin ne’ebé ita hakarak to’o bá. Mai ha’u rasik, tradusaun husi “Le Petit Prince” ba tetun nu’udar viajen ida hanesan ne’e. Ha’u iha kedas ideia atu tradús livru ne’e bainhira ha’u foin to’o mai iha Timór, iha 2001. Iha tempu ne’ebá timoroan sira la iha livru atu lee iha sira-nia lian rasik, no ha'u sente katak ne'e hanesan trajédia ida tan ba povu ne’e. Saint-Exupéry nia istória furak bele sai maneira kapás ida hodi komesa rezolve problema ne’e. Nune’e ha’u hahú tradusaun ho Triana Corte-Real de Oliveira, feto foin-sa’e timoroan ida ne’ebé para tiha ona ninia kursu medisina iha Indonézia tanba akontesimentu sira 1999 nian. Entretantu ha’u ko’alia ho Rui Correia, SUL-Associação de Cooperação para o Desenvolvimento nia prezidente, kona-ba se OLGD (1) ne’e (ne’ebé ha’u mós membru tinan barak ona) bele publika tradusaun husi livru ne’e iha dalen tetun ka lae. Nia hatán kedas ho entuziazmu, “Liurai-Oan Ki’ik” mós sai hanesan buat ida murak iha ninia vida, hanesan akontese ho ita barabarak, no nia hahú kedas buka apoiu oioin. Nia simu resposta pozitiva husi kámara munisipál balu iha Portugál no husi Fundasaun Mário Soares. Entretantu ha’u mós iha ideia katak SUL bele halo parseria ba edisaun konjunta ho Timor Aid, OLG (2) ida husi Timor-Leste ne’ebé pioneiru hodi publika livru iha lian tetun no mós iha ona ninia rede distribuisaun rasik, no Timor Aid konkorda ho ideia ne’e. Rui Correia kontakta Gallimard, ne’ebé kaer daudaun direitu-autór, no konsege hetan autorizasaun ba publikasaun. Prosesu ne’e atraza bainhira Triana, ne’ebé hahú tradusaun ho ha’u, arranka ba Yogyakarta, atu kontinua estuda atu sai médika. Durante períodu ida serbisu la la’o, maibé depois komesa filafali ho kolega serbisu foun, Emília Almeida de Araújo, ne’ebé depois halo ninia baxarelatu kona-ba Informática iha Universidade Nacional de Timor Lorosa’e. Ha’u konsege remata tradusaun ho nia. Durante ami-nia serbisu tradusaun, iha faze rua hotu, ami uza testu orijinál iha lian fransés, maibé ami kompara hela de’it ho solusaun ba tradusaun iha versaun tolu ketaketak ne’ebé editora portugeza sira publika, no dala balu ami mós kompara ho tradusaun ida iha dalen inglés. Maibé mezmu depoizde tradusaun hotu tiha ona, sei iha kontratempu balu ne’ebé atraza prosesu até finalmente bele publika livru ne’e iha lian tetun. Ha’u mós tenke hato’o obrigadu ba Rosália Madeira Soares, husi Timor Aid, ba nia esforsu no laran-metin durante tinan hirak-ne’e. Lansamentu hala’o iha 2010. Ne’e dalan naruk, maibé dalan furak ho rezultadu kapás. Liurai-Oan Ki’ik to’o tiha ona iha Timor-Leste no agora nia la’o bá-mai iha ita-nia leet. Loron ruma bele akontese ha’u-nia leitór laran-di’ak ho nia hasoru malu iha dalan iha fatin ruma…



 

(1) OLGD– Organizasaun La Governamentál ba Dezenvolvimentu

(2) OLG– Organizasaun La Governamentál

 

(ler sobre este assunto em português)

 



sé mak publika: João Paulo T. Esperança às 09:28

 

Iha tinan hirak ikus ne’e komesa mosu iha Timor-Leste materiál báziku barak ne’ebé hakerek iha tetun no iha lian lokál seluseluk, hanesan kartilla ka istória ki’ikoan ne’ebé simples tebes ba labarik ki’ikoan. Materiál ba labarik ne’ebé boot liu ladún iha, no ida-ne’e provavelmente akontese tanba materiál hanesan ne’e difisil liu atu halo. Se ita ko’alia ho lia-loos ita tenke dehan katak naran ema ida bele hasai fotografia balu, ka halo dezeñu balu, no hakerek liafuan ka fraze-oan ruma iha okos, iha tetun ka iha dalen seluk, no kartilla prontu ona. No konserteza iha diferensa boot entre kartilla ida hanesan ne’e no manuál eskolár ba faze alfabetizasaun ne’ebé ema halo ho kritériu adekuadu tuir pedagojia. Hahú mós mosu ona livru-oan ho istória simples, baibain ho fraze balu ne’ebé akompaña ho dezeñu, ne’ebé inan-aman ka maun ka biin bele lee ba labarik to’o tinan 4-5, ka labarik rasik bele lee bainhira sira maizumenus tinan neen. Livriñu sira-ne’e util no sira hatán ba nesesidade ida ne’ebé eziste iha Timor-Leste, maibé devia iha mós materiál ne’ebé dezenvolvidu liu, ba labarik boot.

Ezemplu ida husi istória hanesan ne’e maka livru-oan *“Avoo Leto - Tau foer ba foer fatin”, ne’ebé iha avó ida ke hanorin nia bei-oan kona-ba tanbasá maka importante la soe fo’er ba rai (no ida-ne’e hahalok aat ida ne’ebé timoroan barabarak baibain halo iha Timor-Leste). Livru ida ho intensaun pedagójika, ne’ebé konsege hato’o nia lia-menon, ho dezeñu kapás, maibé infelizmente sei labele fahe iha eskola sira tanba iha sala ortografia nian barabarak.





sé mak publika: João Paulo T. Esperança às 07:02
Sesta-feira, 12 de Abril de 2013

 

Durante tinan barak literatura (la’ós oratura) Timor-Leste nian kuaze hotu-hotu iha lian portugés. Dezde tinan hirak ikus ne’e komesa mosu ona livru no hakerek-na’in foun ne’ebé uza lian tetun. Uluk bainhira ha’u sei labarik, ha’u-nia profesora lian portugés nian ida – provavelmente nia kontente tanba mezmu iha otas ne’ebá ha’u lee hela de’it livru barabarak – hakerek iha ha’u-nia kadernu ida fraze ne’e: “Um país faz-se com homens e com livros.” [Atu halo nasaun ida ita presiza ema no livru sira]. Tuir ha’u-nia profesora ne’e fraze ida husi Mário Sacramento, demokrata ida husi ha’u-nia rain Íllavu durante rai-nakukun naruk faxizmu nian iha Portugál. Fraze ne’e monu tebes ba ha’u-nia laran, no ha’u sei konsidera nafatin hanesan liafuan murak ba ha’u-nia vida. Timor-Leste mai ha'u hanesan ha’u-nia rain daruak no ha’u hanoin katak la iha ema ida bele nega katak sékulu XX haree mane ho feto barak ne’ebé aten-barani, laran-di’ak, laran-luak no laran-loos tebetebes moris iha nasaun ne’e, maibé nu’udar lia-loos jerál ita bele dehan katak livru sira sei falta nafatin. Balu iha ona, no ita tenke hahi’i Takas (Luís Cardoso) nia obra, maibé tanba ne’e hakerek iha lian portugés, ne’ebé nu’udar dalen ida timoroan sira-nian maibé ema barak seidauk hatene ko’alia moos, ninia livru sira iha impaktu ki’ik iha sosiedade. Foin daudaun hahú mosu literatura ho lian tetun no ida-ne’e fó esperansa ba ita atu haree mudansa, atu espera katak la kleur sei mosu jerasaun ida ne’ebé lee duni. No lee iha tetun sei nunka sai obstákulu ba ema atu la lee iha portugés aban-bainrua. Labarik sira ne’ebé lee iha lian tetun bainhira sira sei ki’ik bele komesa hadomi livru sira, no ema ne’ebé nia laran monu tiha ona ba livru sei nunka hakarak atu para lee, no bainhira nia lee hotu tiha livru hotu-hotu iha dalen tetun (kualkér leitór ida bele lee iha tempu maizumenus badak livru HOTU-HOTU ne’ebé eziste iha lian tetun, infelizmente), no nia kontinua hamrook hodi aprende tan, hodi sente tan, entaun nia sei lee iha lian seluseluk, no konserteza nia sei hahú ho portugés.

Ha’u sei komesa hakerek beibeik iha ne’e kona-ba livru sira, livru Timór nian, livru kona-ba Timór, no livru iha lian tetun – orijinál ka tradusaun. Iha loron ne’e ha’u sei hahú ho novela ki’ik ida ne’ebé OLG Timor Aid publika iha Novembru 2012 ho títulu “Inan ne’ebé iha bosok ualu”, husi hakerek-na’in timoroan ida ne’ebé sei tinan 17, naran Ariel Mota Alves. Obra ne’e hetan terseiru lugár iha konkursu literáriu iha lian tetun ne’ebé Timor Aid ho Fundasaun Alola organiza tinan-tinan, no ha’u mós biban sai tiha ona membru juri. Livru-oan ne’e nia istória ladún komplikadu, ho mensajen ne’ebé fó morál, maibé kapás tanba konsege hato’o nia lia-menon ho efikásia. Personajen prinsipál maka Bisoi ho ninia oan-mane Atoi, no istória ne’e haktuir kona-ba dezafiu sira-ne’ebé sira hasoru durante sira-nia moris. Inan ho oan ne’e kiak rabat rai, maibé inan sakrifika an, fó nia an tomak ba esforsu hodi hamosu oportunidade oioin ne’ebé antes la iha, atu nune’e bele fó vida di’ak liután ba nia oan. Husi sorin seluk, nia oan simu no aproveita ida-ne’e, no tau ninia esforsu rasik hamutuk ho nia inan nian, maibé nia mós sei presiza hasoru ninia dilema rasik.

Livru ida ne’ebé, maski nia enredu simples, labarik no foin-sa’e timoroan barabarak devia lee, hodi bolu sira-nia atensaun no halo sira hanoin kona-ba oinsá maka sira-nia inan-aman dala barak haka’as an paramate hodi buka fó di’ak ba sira, no mós nu’udar omenajen ba feto nasaun ne’e nian. Ha’u koñese ona feto-Timór barak ne’ebé barani hanesan Bisoi ne’e durante tempu liu dékada ida ona ne’ebé ha’u hela iha Timór. Literatura la tenke buka atu muda mundu, maibé bele buka atu muda mundu. Obra ida-ne’e, husi autór ne’ebé sei otas nurak, buka atu halo ninia parte. capa do livro Inan ne'ebé iha bosok ualu


Inan ne'ebé iha bosok ualu



sé mak publika: João Paulo T. Esperança às 15:53
Timor-Leste seidauk iha Planu Nasionál ba Leitura, maibé presiza tebetebes atu halo povu, no liuliu labarik, komesa hadomi livru. Ne’e ha’u-nia kontribuisaun ida…
kona-ba ba ha'u
Maiu 2013
Dom
Seg
Ter
Kua
Kin
Ses
Sab

1
2
3
4

5
6
7
8
9
10
11

12
13
14
15
16
17
18

19
20
21
22
23
24
25

26
27
28
29
30
31


arkivu
2013

peskiza íha blog ida-ne'e
 
www.flickr.com
This is a Flickr badge showing public items from the People reading (Comment 1) group pool. Make your own badge here.
www.flickr.com
This is a Flickr badge showing public items from the The Little Prince group pool. Make your own badge here.
www.flickr.com
This is a Flickr badge showing public items from the Women and Girls Reading group pool. Make your own badge here.
www.flickr.com
This is a Flickr badge showing public items from the El Principito - Le Petit Prince - The Little Prince group pool. Make your own badge here.
subskreve feeds
blogs SAPO